The story of a younger Bai Ding

Both Bai Ding and Joe are my high school classmates (from different schools in HK) whom I never met.

-----

阿 Joe 哥，你都好苦，如果嗰陣時你跟住我後面聽「碧血劍」，我隔日至收你錢。菠蘿包好食，但熱豬仔包仲正呀，嗰陣時食乜都正，因為成日都肚餓。
> 講古其實很辛苦，因為我有哮喘病，日日要去九龍醫院排隊打針，由紅墈行到宋王台就已經好似隻蝦公（哮喘又叫扯蝦) 咁爬，番去時因為打咗針就
> high 到極, 好似個飛仔。
>
> 嗰陣時真係有奶便是娘，如果共產黨請我食豬仔包我就返去了。我哋俾親戚『請』離羅便臣道之後，就搬咗去紅墈，但我仍舊喺半山「仿林中學」嘅小學讀書，過海之後要坐巴士，想食個包就唔坐，慳番幾毫子，行上去。搭船過海最鍾意睇
> 人地嘅報紙，乜乜『美國啃泥地總統暴斃』，『三狼今日問吊』之類。
>
> 講起上嚟有件事我仲未明白，有次我回家，由統一碼頭坐巴士，同埋有仿林一個姓郭嘅老師，呢個老師雖然係個哨牙婆，但係人好好，時時陪我番屋企，點知嗰次在 車中我突然黐咗線，想跳落去，然後就冇咗知覺，醒來時見到一切如常，我在做緊功課，原來已經係兩個星期之後，但係人人都冇問我，我問亞媽，嗰日我跳車？佢 話我有，但老師捉住我，我冇事，日日番學，食飯，問嚟做乜？我唔敢嚇佢，但我兩個星期係完全昏迷不醒的。
>
> 幾年前返香港，想帶家人懷舊，等啲仔女知道下老竇的過去，但唔知中環而家有電梯上去，一家人係咁行，行到堅道時，老婆仔女已經頂唔住，鬧到我幾乎斷氣，個衰仔問老竇，就咁慳番幾毫子乎？
>
> 我用廣東話寫，因為那是一段廣東話的歲月，我不像別人，可以放淂下，流星歲月，悠悠往事，少年情懷永不會枯萎，也許如蘇東坡所說，『多情應笑我』吧。
>
> 講古佬話，有詩為證﹕
>
> 人似飛蓬東復西，牢騷又犯把詩題。
> 頻年海角舟難渡，何日山中鳥可棲。
> 半壁興亡經眼過，一生歌哭為花迷。
> 只愁身在江南過，不見多情燕子泥。

------------
唉，個月係圓嘅，但人生就得一條直路，翻轉頭就乜 都搵唔到啦。鐵路球場？大頭仔郭榮踢波？蕪湖街？紅墈遊樂場？鶴園街？青洲英泥廠？春田街？華樂戲院？海心廟？一心涼，一定好，以前甩腳毛嘅地方，最好一 早搬去月球，今日就唔會俾人拆鬼哂。但諗起嚟，與其上月球，我寧願喺海心廟賞月，嗰度仲有個講古佬叫「半日窮」，晚晚聲如洪鐘: 『挑！灣仔有個仆街叫做「窮半日」，廟街有個打壞叫做「窮日半」，但細路係「半日窮」！今日飲飽燒酒 ...... 』

嗰陣我係「成日窮」， 但好開心，幾十年啲街坊味，我而家係「月尾窮」，但滄海桑田，就算好似阿 Joe 哥咁有錢，都唔想買漆咸道。

-----------